ശബരിമലയെപ്പറ്റി ചോദ്യം; ചിരിയോടെ കണ്ണുരുട്ടി, അടികൊളളുമെന്ന ആംഗ്യം കാട്ടി മോഹൻലാൽ

കൊച്ചി: ശബരിമല സംബന്ധിച്ചുയര്‍ന്ന ചോദ്യം മാധ്യമപ്രവര്‍ത്തകർക്കിടയിൽ നിന്നുയർന്നിട്ടും ഒന്നും മിണ്ടാതെ മോഹൻലാൽ. അമ്മ യോഗത്തിലെ അജണ്ടയെപ്പറ്റി സംസാരിച്ച ശേഷം പോകാന്‍ തുടങ്ങിയ താരത്തോട് ശബരിമല വിധിയിൽ നിലപാടെന്തെന്ന ചോദ്യം ഉയര്‍ന്നു. സ്വതസിദ്ധമായ ചിരിയോടെ കണ്ണുരുട്ടി, അടികൊളളുമെന്ന ആംഗ്യമായിരുന്നു താരത്തിന്റെ പ്രതികരണം. ഇതു കണ്ട് നിന്ന മാധ്യമപ്രവർത്തകർക്കും ചിരി അടക്കാൻ കഴിഞ്ഞില്ല.

അമ്മയുടെ എക്‌സിക്യൂട്ടീവ് യോഗം ഇന്നുണ്ടെന്നും സര്‍ക്കാരിനായി ഒരു ഷോ ചെയ്യുന്നുണ്ടെന്നും മാധ്യമപ്രവര്‍ത്തകരുടെ ചോദ്യത്തിനു മോഹന്‍ലാല്‍ മറുപടി നല്‍കി. പ്രളയദുരന്തത്തില്‍ തകര്‍ന്ന കേരളത്തിനായി അഞ്ചുകോടി രൂപ സമാഹരിക്കാന്‍ അബുദാബിയില്‍ വെച്ചാണ് ഷോയെന്നും അദ്ദേഹം പറഞ്ഞു. നടിമാരുടെ പരാതിയില്‍ നിയമപരമായ അഭിപ്രായം തേടിയിട്ടുണ്ടെന്നും അത് ഇന്നു വൈകിട്ട് നടക്കുന്ന യോഗത്തില്‍ ചര്‍ച്ച ചെയ്യുമെന്നും മോഹന്‍ലാല്‍ പറഞ്ഞു.

പ്രളയത്തിൽ ദുരിതം അനുഭവിച്ച കാലടി സംസ്‌കൃത സർവ്വകലാശാലയിലെ വിദ്യാർഥിനികൾക്ക് മോഹൻലാലിന്റെ നേതൃത്വത്തിൽ ദുരിതാശ്വാസ സഹായ വിതരണവും നടന്നു. സർവ്വകലാശാല ഓഡിറ്റോറിയത്തിൽ നടന്ന ചടങ്ങിൽ 200 വിദ്യാർഥിനികൾക്ക് 5000 രൂപയുടെ വസ്ത്രങ്ങൾ വാങ്ങാനായി കൂപ്പണുകൾ വിതരണം ചെയ്തു. മോഹൻലാല്‍ നേതൃത്വം നൽകുന്ന വിശ്വശാന്തി ഫൗണ്ടേഷന്റെ മൂന്നാം ഘട്ട പ്രളയ സഹായ വിതരണമാണിത്. ശീമാട്ടിയുമായി സഹകരിച്ചാണ് സഹായ വിതരണം. ഇന്നസെന്റ് എംപിയും സർവകലാശാല വൈസ് ചാൻസലർ ഡോ.ധർമരാജ് അടാട്ട്, ബീന കണ്ണൻ എന്നിവരും ചടങ്ങിൽ പങ്കെടുത്തു.

നേരത്തെ കൊച്ചിയില്‍ കന്യാസ്ത്രീകളുടെ സമരം നടക്കവെ, മോഹൻലാലിന്റെ നിലപാടിനെക്കുറിച്ചു ചോദിച്ച മാധ്യമപ്രവർത്തകനോട് അദ്ദേഹം പറഞ്ഞ മറുപടി ഏറെ വിവാദമാകുകയും തുടർന്ന് അദ്ദേഹം മാപ്പു പറയുകയും ചെയ്തിരുന്നു.