ജനസംഖ്യയിൽ ഇന്ത്യ ചൈനയെ പിന്തള്ളും; 2050 ൽ ചൈനയുടെ ജനസംഖ്യ3.14 കോടിയോളം കുറയും

ന്യൂയോർക്ക്: ഇന്ത്യ ജനസംഖ്യയുടെ കാര്യത്തിൽ ചൈനയെ മറികടക്കും. എട്ടുവർഷത്തിനുള്ളിൽ ഏറ്റവും കൂടുതല്‍ ജനസംഖ്യയുള്ള രാജ്യമായി ഇന്ത്യ മാറുമെന്ന് യുഎന്‍ റിപ്പോര്‍ട്ട്. 2050 ആകുമ്പോഴേക്കും ലോക ജനസംഖ്യ 770 കോടിയില്‍ നിന്ന് 970 കോടിയായി ഉയരും. അതേസമയം ഇന്ത്യയുള്‍പ്പെടെ ഒമ്പത് രാജ്യങ്ങളിലായിരിക്കും ലോക ജനസംഖ്യയുടെ പകുതിയും ഉണ്ടാവുകയെന്നും റിപ്പോര്‍ട്ട് പറയുന്നു.

ഇന്ത്യ, നൈജീരിയ, പാകിസ്താന്‍, കോംഗോ, ഏത്യോപിയ, ടാന്‍സാനിയ, ഇന്തോനേഷ്യ, ഈജിപ്ത്, അമേരിക്ക എന്നീ രാജ്യങ്ങളാകും അവ. 2019 മുതല്‍ 2050 വരെയുള്ള കാലത്ത്‌ ചൈനീസ് ജനസംഖ്യ 3.14 കോടിയോളം കുറയുമെന്നും റിപ്പോര്‍ട്ടില്‍ പറയുന്നു. വേള്‍ഡ് പോപ്പുലേഷന്‍ പ്രോസ്‌പെക്ടസ് -2019 എന്ന റിപ്പോര്‍ട്ടിലാണ് ഇക്കാര്യങ്ങള്‍ ചൂണ്ടിക്കാണിക്കുന്നത്. 2050 ൽ ചില ആഫ്രിക്കന്‍ മേഖലകളില്‍ ജനസംഖ്യ ഇരട്ടിയോളം വര്‍ധിക്കും.

എന്നാൽ പ്രത്യുത്പാദന നിരക്ക് കുറയുകയാണെന്നും റിപ്പോര്‍ട്ട് പറയുന്നു. 1990 ല്‍ ഒരു സ്ത്രീയ്ക്ക് ജനിക്കുന്ന കുട്ടികളുടെ എണ്ണം ശരാശരി 3.2 ആയിരുന്നവെങ്കില്‍ 2019 ആകുമ്പോള്‍ അത് 2.2 ആയി കുറഞ്ഞു. 2050 ആകുമ്പോഴേക്കും ഇത് 2.1 ലേക്ക് താഴും.

അതേസസമയം മനുഷ്യരുടെ ആയുര്‍ദൈര്‍ഘ്യവും വർദ്ധിച്ചിട്ടുണ്ട്. 1990 ല്‍ 64.2 ആയിരുന്നു ശരാശരി ആയുര്‍ദൈര്‍ഘ്യമെങ്കില്‍ 2019 ആയപ്പോള്‍ അത് 72.6 ആയി ഉയര്‍ന്നു. 2050 ആകുമ്പോഴേക്കും 77.1 ആയി ആയുര്‍ദൈര്‍ഘ്യം വര്‍ധിക്കുമെന്നും യു.എന്‍. റിപ്പോര്‍ട്ടില്‍ പറയുന്നു.