അയോധ്യ കേസ്: ജസ്റ്റീസ് യു.യു. ലളിത് പിൻമാറി; വാദം കേള്‍ക്കുന്നത് 29-ലേക്ക് മാറ്റിവെച്ചു

ഡല്‍ഹി: അയോധ്യകേസ് വാദം കേള്‍ക്കുന്നതില്‍ നിന്ന് ജസ്റ്റിസ് യു.യു.ലളിത് പിന്‍മാറി. ഇതേ തുടര്‍ന്ന് കേസില്‍ വാദം കേള്‍ക്കുന്നത് ജനുവരി 29-ലേക്ക് മാറ്റിവെച്ചു. ചീഫ് ജസ്റ്റിസ് രഞ്ജന്‍ ഗോഗോയി അധ്യക്ഷനായ അഞ്ചംഗ ബെഞ്ചില്‍ നിന്നാണ് യു.യു.ലളിത് പിന്‍മാറിയത്. 29-ന് ചീഫ് ജസ്റ്റിസിന്റെ തന്നെ അധ്യക്ഷതയില്‍ പുതിയ ബെഞ്ചായിരിക്കും കേസില്‍ വാദം കേള്‍ക്കുക.

കേസില്‍ അന്തിമ വാദം തുടങ്ങുന്ന തിയതി. കേസിന്റെ സമയക്രമമടക്കം അന്നേ ദിവസം തീരുമാനിക്കുമെന്നും ചീഫ് ജസ്റ്റിസ് രഞ്ജന്‍ ഗൊഗോയി അറിയിച്ചു. കേസിലെ രേഖകളെ സംബന്ധിച്ച് തര്‍ക്കമുള്ളതിനാല്‍ ഔദ്യോഗിക പരിഭാഷകനെ ചുമതലപ്പെടുത്തി. മുദ്രവെച്ച 15 ട്രങ്ക്‌പെട്ടികളിലായി പേര്‍ഷ്യന്‍,സംസ്‌കൃതം, അറബി, ഗുര്‍മുഖി, ഹിന്ദു എന്നീ ഭാഷകളിലാണ് രേഖകള്‍ പരിഭാഷപ്പെടുത്തേണ്ടത്. കേസില്‍ 88 സാക്ഷികളും 15800 പേജ് സാക്ഷി മൊഴികളുമുണ്ട്. ഹൈക്കോടതി വിധി 8533 പേജുകളുമുണ്ട്. രേഖകള്‍ നേരിട്ട് പരിശോധിച്ച് രജിസ്ട്രി നല്‍കുന്ന റിപ്പോര്‍ട്ടിന്റെ അടിസ്ഥാനത്തിലാണ് കോടതി കേസിന്റെ അന്തിമ വാദത്തിനുള്ള തിയതി പ്രഖ്യാപിക്കുക.

യു.യു.ലളിത് അഭിഭാഷകനായിരുന്ന സമയത്ത് ബാബ്‌റി മസ്ജിദ് തകര്‍ത്തതുമായി ബന്ധപ്പെട്ട ക്രിമിനല്‍ കേസില്‍ കല്യാണ്‍ സിങ്ങിനായി ഹാജരായിരുന്നുവെന്ന് മുസ്‌ലിം സംഘടനകള്‍ക്ക് വേണ്ടി ഹാജരായ രാജീവ് ദിവാന്‍ ആരോപിച്ചു. ഇതേ തുടര്‍ന്നാണ് യു.യു.ലളിത് പിന്‍മാറിയത്.

മുന്‍ ചീഫ് ജസ്റ്റിസ് ദീപക് മിശ്രയുള്‍പ്പെട്ട ബെഞ്ച് കേസ് നേരത്തേ പരിഗണിച്ചിരുന്നെങ്കിലും അത് ഒരു ഭൂമിത്തര്‍ക്കമാണെന്ന് വ്യക്തമാക്കിയിരുന്നു. എന്നാല്‍ പുതിയ ചീഫ് ജസ്റ്റിസ് രഞ്ജന്‍ ഗോഗോയി വാദം കേള്‍ക്കാനായി ഭരണഘടനാ ബഞ്ചിനു രൂപം നല്‍കുകയായിരുന്നു.

യു.യു.ലളിതിനെ കൂടാതെ ചീഫ് ജസ്റ്റിസ് രഞ്ജന്‍ ഗോഗോയ്, ജസ്റ്റിസുമാരായ എസ്.എ ബോബ്‌ഡെ, എന്‍.വി രമണ, ഡി.വൈ ചന്ദ്രചൂഢ് എന്നിവര്‍ ഉള്‍പ്പെട്ടതായിരുന്നു ബെഞ്ച്.

നേരത്തേ അലഹബാദ് ഹൈക്കോടതി അയോധ്യയിലെ തര്‍ക്കഭൂമി മൂന്നായി വിഭജിക്കാന്‍ ഉത്തരവിട്ടിരുന്നു. ബാബ്‌റി മസ്ജിദ് തകര്‍ക്കപ്പെട്ട സ്ഥലത്തെ 2.77 ഏക്കര്‍ ഭൂമി സുന്നി വഖഫ് ബോര്‍ഡിനും നിര്‍മോഹി അഖാഡയ്ക്കും രാം ലല്ലയ്ക്കും തുല്യമായി വീതിച്ചുനല്‍കിയ വിധിക്കെതിരെ 16 ഹര്‍ജികളാണ് സുപ്രീം കോടതിയിലെത്തിയത്.

രാമക്ഷേത്ര നിര്‍മാണത്തിന് ഓര്‍ഡിനന്‍സ് ഇറക്കണമെന്ന് ആവശ്യപ്പെട്ട് വിവിധ ഹിന്ദു സംഘടനകള്‍ സര്‍ക്കാരില്‍ സമ്മര്‍ദം ചെലുത്തി വരികയാണ്. അതുകൊണ്ടുതന്നെ കേസില്‍ അന്തിമവിധി പുറപ്പെടുവിക്കാന്‍ കേന്ദ്രസര്‍ക്കാര്‍ ആവശ്യപ്പെട്ടേക്കുമെന്നാണ് കരുതുന്നത്.