എയര്‍സെല്‍-മാക്‌സിസ് അഴിമതിക്കേസില്‍ ചിദംബരത്തെയും മകനെയും പ്രതിയാക്കി സി.ബി.ഐ കുറ്റപത്രം

ഡല്‍ഹി: എയര്‍സെല്‍ മാക്‌സിസ് കേസില്‍ മുന്‍ കേന്ദ്രമന്ത്രി പി.ചിദംബരത്തെയും മകന്‍ കാര്‍ത്തിയെയും പ്രതിയാക്കി സി.ബി.ഐ കുറ്റപത്രം സമര്‍പ്പിച്ചു. ഡല്‍ഹി പട്യാലഹൗസ് കോടതിയിലാണ് സിബിഐ കുറ്റപത്രം സമര്‍പ്പിച്ചത്.

ചിദംബരം ഉള്‍പ്പടെ 16 പേര്‍ക്കെതിരായ കുറ്റപത്രമാണ് സി.ബി.ഐ കോടതിയില്‍ സമര്‍പ്പിച്ചിരിക്കുന്നത്. 2006ല്‍ ചിദംബരം ധനമന്ത്രിയായിരിക്കെ മുംബൈ ആസ്ഥാനമായി പ്രവര്‍ത്തിക്കുന്ന എയര്‍സെല്‍ കമ്പനിക്ക് 600 കോടി രൂപയുടെ വിദേശനിക്ഷേപം സ്വീകരിക്കാന്‍ ചട്ടങ്ങള്‍ മറികടന്ന് അനുമതി നല്കിയെന്നാണ് കേസ്. ഇതിനായി കമ്പനിയില്‍ നിന്ന് 26 ലക്ഷം രൂപ കാര്‍ത്തി ചിദംബരം കൈക്കൂലിയായി വാങ്ങിയെന്നും എന്‍ഫോഴ്‌സ്‌മെന്റ് വിഭാഗം കണ്ടെത്തിയിരുന്നു.

ഊഹാപോഹങ്ങളുടെയും കള്ളത്തെളിവുകളുടെയും അടിസ്ഥാനത്തിലാണ് സിബിഐ തനിക്കും മകനുമെതിരെ കേസെടുത്തിരിക്കുന്നതെന്നാണ് ചിദംബരത്തിന്റെ വാദം.